husn jab maqtal ki janib tegh-e-burran le chala
ishq apne mujrmon ko pa-ba-jaulan le chala
arzu-e-did-e-janan bazm men laa.i mujhe
bazm se main arzu-e-did-e-janan le chala
bismilon ko zaḳhm zaḳhmon ko mubarak lazzaten
su-e-maqtal phir koi tegh-o-namak-dan le chala
ḳhun-e-nahaq ki haya boli zara munh Dhank lo
naaz jab un ko sar-e-ḳhak-e-shahidan le chala
kaT gaya ashiq sar-e-bazar sauda bik gaya
jan-e-laila ishq ne dil husn-e-ḳhuban le chala
ḳhak-e-ashiq rokne ko duur tak lipTi ga.i
jab samand-e-naz ko vo garm-jaulan le chala
mere ghar tak paanv paḌ kar un ko laaya tha niyaz
naaz daman khinchta su-e-raqiban le chala
dil ko janan se ‘hasan’ samjha-bujha ke laa.e the
dil hamen samjha-bujha kar su-e-janan le chala
Leave a Reply