jab tak mire honTon pe tira naam rahega
dil be-ḳhabar-e-gardish-e-ayyam rahega
miT ja.ega har naqsh-e-ḳhayal-e-gham-e-hasti
lekin varaq-e-dil pe tira naam rahega
kyuun Dar hai gunahon ke sabab hashr ke din se
ham jante hain un ka karam aam rahega
paigham to a.enge bahut dair-o-haram se
lekin tiri chaukhaT se mujhe kaam rahega
mai-ḳhana salamat hai agar teri nazar ka
labrez ma-e-ishq se har jaam rahega
daman hai agar tera mire dast-e-talab men
aghaz se behtar mira anjam rahega
ja.egi na dil se tire aariz ki mohabbat
zulfon ka tasavvur mujhe har shaam rahega
ankhen hi nahin teri ‘fana’ diid ke qabil
tu jalva-gah-e-yar men nakam rahega
Leave a Reply