Dil Ki Baaten Dil Se Karna Itna Bhi Aasan Nahin

dil ki baten dil se karna itna bhi asan nahin

ḳhud ki ḳhatir ḳhud men rahna itna bhi asan nahin

pal jo guzre teri ḳhatir mad-hoshi ke aalam men

ḳhamoshi men sunte rahna itna bhi asan nahin

hijr ki shab jab chand ko dekha to mujh ko mahsus hua

apne aap men til til marna itna bhi asan nahin

aap vafa ke paikar the ham hi vafa ko samjhe nahin

ḳhud ko hi ilzam ye dena itna bhi asan nahin

tum se bichhaḌ ke yaad tumhari shaz-o-nadir hi aa.i

Duubi ankhon se ye kahna itna bhi asan nahin

‘aslam’ aap hain sab se achchhe aur us par ma.asum bahut

phulon ke ye nashtar sahna itna bhi asan nahin