basa-auqat aa jaate hain daman se gareban men
bahut dekhe hain aise josh ashk-e-chashm-e-giryan men
nahin hai taab zabt-e-gham kisi ashiq ke imkan men
dil-e-ḳhun-gashta ya daman men hoga ya gareban men
mubarak badiya-gardo bahar aa.i bayaban men
numud-e-rang-e-gul hai har sar-e-ḳhar-e-mughilan men
ziyada ḳhauf-e-rusva.i nahin hai soz-e-pinhan men
dhuan hota hai lekin kam charagh-e-zer-e-daman men
hamesha pi ke mai jaam o surahi toḌ deta huun
na mera dil tarasta hai na farq aata hai iman men
maza kyuun kavish-e-zaḳhm-e-jigar ka aaj kam kam hai
namak ki koi chuTki rah ga.i hogi namak-dan men
janab-e-qais ne dil se bhulaya donon aalam ko
junun ke chaar harfon ka sabaq lekar dabistan men
bahar aa.i mila ye hukm mujh ko aur bulbul ko
ki vo kaaTe qafas men ḳhaak chhanun main bayaban men
tarannum-reziyan bazm-e-suḳhan men sun ke ‘sa.el’ ki
guman hota hai bulbul ke chahakne ka gulistan men
Leave a Reply