sard hava hai nauhagar raat bahut guzar ga.i
ghaur se dekh chashm-e-tar raat bahut guzar ga.i
niind men gum hain dasht-o-bagh bujh ga.e shahr ke charagh
aise men ja.un main kidhar raat bahut guzar ga.i
ab to simaT rahe hain saa.e lauT ke vo javan na aa.e
dil men ajiib sa hai Dar raat bahut guzar ga.i
guunj rahi hai duur tak apne hi qadmon ki sada
suuni paḌi hai rahguzar raat bahut guzar ga.i
jashn-e-tarab hua tamam kushta-charagh-o-saz-o-jam
bikhre paḌe hain farsh par raat bahut guzar ga.i
mahfil-e-dostan se kab uThne ko chahta hai dil
soch raha huun ja.un ghar raat bahut guzar ga.i
jaaga na ek shaḳhs bhi meri nava-e-dard se
naale ga.e hain be-asar raat bahut guzar ga.i
dil men mire utar ga.i sahn-e-makan ki tirgi
bujh ga.i sham.a taaq par raat bahut guzar ga.i
ḳhauf ke saa.e char-su ai mire yaar mah-ru
aaj yahin qayam kar raat bahut guzar ga.i
so ga.e ghar ke sab makin par mire intizar men
jaag rahe hain bam-o-dar raat bahut guzar ga.i
ghar ki munDer se ga.i chand ki zard raushni
duur nahin hai ab sahar raat bahut guzar ga.i
Leave a Reply