rahin-e-bim-e-hasti hai dil-e-divana barson se
hava ki zad men hai apna charagh-e-ḳhana barson se
ḳhusha ai josh-e-hasrat ashk bhar aa.e hain ankhon men
tarasta tha charaghan ko mira kashana barson se
ye husn-o-ishq afkar-e-azal ki yadgaren hain
zaban-e-dahr dohrati hai ye afsana barson se
junun-e-ishq ko me.araj par pahuncha diya ham ne
hai apne chak-e-pairahan men ik virana barson se
ye hasrat hai javani baryab-e-husn ho jaa.e
hai avara ye mauj-e-nik.hat-e-mastana barson se
jhuka duun arsh-o-kursi ko agar vo samne aa.en
liye phirta huun shauq-e-sajda-e-rindana barson se
mohabbat men ‘zafar’ hai be-ḳhudi bhi sho.ala-tabi bhi
mai-e-do-atisha piita huun main rozana barson se
Leave a Reply