tu aankh ke raste se mire dil men utar ja
tu ashk-e-vafa ban ke in ankhon men Thahar ja
murjha.e hue phulon ko ik rang naya de
ulfat ki ada ban ke tu raste se guzar ja
tu meri ḳhizan-shab ke andheron ko kiran de
ḳhushbu ki tarah dil men har ik samt bikhar ja
ḳhamosh hain alfaz mire un ko zaban de
is zulf se kah de kisi lamhe to sanvar ja
kuchh aur nahin dil men tamanna magar ai jaan
tu pahle hi ik phuul hai ab aur nikhar ja
Leave a Reply