Sheen Kaaf Nizam
chhin kar vo lazzat-e-saut-o-sada le ja.ega
haath shal kar ja.ega harf-e-dua le ja.ega
biich ka baḌhta hua har fasla le ja.ega
ek tufan aa.ega sab kuchh baha le ja.ega
dekhna baḌhta hua ye ḳhvahishon ka silsila
mauj-e-ḳhun dikhla.ega rang-e-hina le ja.ega
be-muqaddar chhoḌ ja.ega sabhi peshaniyan
raushni ankhon ki siine ki ziya le ja.ega
ghar se jaate vaqt vo ab ke buzurgon ki dua
le to ja.ega magar Darta hua le ja.ega
lams men mil ja.ega avaz ka asrar bhi
paniyon ke paikaron ko bhi uTha le ja.ega
ik parinda raat ki chaukhaT pe aa.ega ‘nizam’
dekhna hai dega kya aur ham se kya le ja.ega
Leave a Reply