a.ine men dekh ke chehra be-shak main hairan hua
dil ki duniya luuT gaya hai jo dil ka mehman hua
tu ne apna chain ganvaya meri niind uḌa di hai
dil ke nazuk rishte men to donon ka nuqsan hua
tere sanson ki ḳhushbu se mahak rahi hai tanha.i
tera ek tabassum mere jiine ka saman hua
kahan ga.e vo jin ke dam se kheton men hariyali thi
suuni kyuun gaanv ki galiyan kyuun angan viran hua
kitne fankaron ne ab tak jazbon ko alfaz diye
apne gham ka sarmaya hi sha.ir ki pahchan hua
vaise to asan nahin tha khulna band kivaḌon ka
daḳhil hona dil men lekin dastak se asan hua
Leave a Reply