Jis Waqt Usne baKHt Hamare Banae The

Poet

jis vaqt us ne baḳht hamare bana.e the

ham ne hatheliyon pe sitare bana.e the

kuchh panchhiyon ne ghonsle peḌon ke jhunD men

unchi jag.hon pe ḳhauf ke maare bana.e the

main ne bas ek nahr nikali thi haath se

dariya ne aap apne kinare bana.e the

hasb-e-murad dast-e-hunar bolne laga

gunge ne chand aise ishare bana.e the

kuchh zindagi ba-yad-e-azizan zarur thi

kuchh dost ham ne jaan se pyare bana.e the

ham ne haya pahan ke mohabbat-shi.ar ki

guḌiyon ke vaste bhi gharare bana.e the

dil men ‘nasim’ husn ki takfil ke liye

ankhon ne kaise kaise idare bana.e the