vahan pahunch ke ye kahna saba salam ke baad
ki tere naam ki rat hai khuda ke naam ke baad
vahan bhi vada-e-didar is tarah taala
ki khaas log talab honge bar-e-am ke baad
gunahgar ki sun lo to saaf saaf ye hai
ki lutf-e-rahm-o-karam kya phir intiqam ke baad
talab tamam ho matlub ki agar had ho
laga hua hai yahan kuuch har maqam ke baad
vo khat vo chehra vo zulf-e-siyah to dekho
ki shaam sub.h ke baad aae sub.h shaam ke baad
payam-bar ko ravana kiya to rashk aaya
na ham-kalam ho us se mire kalam ke baad
abhi to dekhte hain zarf bada-khvaron ka
subu o khum ki bhi thahregi daur-e-jam ke baad
ilahi ‘asi’-e-betab kis se chhuta hai
ki khat men roz-e-qayamat likha hai naam ke baad
Leave a Reply