miri laghzishon pe nazar na kar mujhe rahmaton se navaz de
baḌa hoga mujh pe tira karam tu mohabbaton se navaz de
tire ishq men bhi maza mile tire hijr men bhi maza mile
rahun gham men tere jo mubtala unhin chahaton se navaz de
tu bana le apna mujhe agar mujhe faḳhr hoga nasib par
mira naam hoga jahan men mujhe shohraton se navaz de
nahin koi dil men tire siva tu mira sanam hai mira ḳhuda
mire dil ko jis se jila mile unhen nisbaton se navaz de
phirun ku-ba-ku yahan dar-ba-dar tire naqsh-e-pa pe miri nazar
tu bula kar apne qarib-tar mujhe qurbaton se navaz de
Leave a Reply