Ye Jo Zindagi Hai Ye Kaun Hai

Farhat Abbas Shah

ye jo zindagi hai ye kaun hai

ye jo bebasi hai ye kaun hai

ye tumhare lams ko kya hua

ye jo be-hisi hai ye kaun hai

vo jo mere jaisa tha kaun tha

ye jo aap si hai ye kaun hai

mire char-su mire char-su

ye jo bekali hai ye kaun hai

mire ang ang men bas ga.i

ye jo sha.iri hai ye kaun hai

vo jo tirgi thi vo kaun thi

ye jo raushni hai ye kaun hai

mujhe kya ḳhabar mujhe kya pata

ye jo be-ḳhudi hai ye kaun hai

vo jo gham se chuur tha kaun tha

jo ḳhushi ḳhushi hai ye kaun hai

vo jo pahla dard tha kis ka tha

ye jo aḳhiri hai ye kaun hai