Asrarul Haq Majaz
ba-sad ghurur ba-sad fakhr-o-naz-e-azadi
machal ke khul gai zulf-e-daraz-e-azadi
mah-o-nujum hain naghma-taraz-e-azadi
vatan ne chheda hai is tarah saz-e-azadi
zamana raqs men hai zindagi ghazal-khvan hai
zamana raqs men hai zindagi ghazal-khvan hai
har ik jabin pe hai ik mauj-e-nur-e-azadi
har ik aankh men kaif-o-surur-e-azadi
ghulami khak-basar hai huzur-e-azadi
har ek qasr hai ik bam-e-tur-e-azadi
har ek baam pe ik parcham-e-zar-afshan hai
har ek samt nigaran-e-yasmin-paikar
nikal pade hain dar-o-bam se mah-o-akhtar
vo sail-e-nur hai khira hai aadmi ki nazar
ba-sad ghurur-o-ada khanda-zan hai gardun par
zamin-e-hind ki jola-nigah ghazalan hai
sada do anjum-e-aflak raqs farmaen
butan-e-kafir-o-saffak raqs farmaen
sharik halqa-e-idrak raqs farmaen
tarab ka vaqt hai bebak raqs farmaen
ki ye bahar-e-payami-e-sad-baharan hai
ye inqalab ka muzhda hai inqalab nahin
ye aftab ka partav hai aftab nahin
vo jis ki tab-o-tavanai ka javab nahin
abhi vo sai-e-junun-khez kamyab nahin
ye intiha nahin aghaz-e-kar-e-mardan hai
Leave a Reply