aaj mai-ḳhane men barkat hi sahi
mai-kasho aao ibadat hi sahi
chahiye kuchh to pa-e-nazr-e-karam
ai gunahgar nadamat hi sahi
ma.ani-e-husn samajh lenge kabhi
abhi mahviyyat-e-surat hi sahi
zindagi maut se behtar hai zarur
hai musibat to musibat hi sahi
na sahi bar-taraf ai husn abhi
chaar din ki hamen ruḳhsat hi sahi
hai hamen apni mohabbat se gharaz
un ko nafrat hai to nafrat hi sahi
zindagi kaT to rahi hai ‘natiq’
ḳhair ghurbat hai to ghurbat hi sahi
Leave a Reply