har safar ke ba.ad vaisa hi safar rakkha gaya
aur phir maqsum mera dar-ba-dar rakkha gaya
arsa-e-dasht-e-talab ko intiha baḳhshi ga.i
mohlat-e-umr-e-ravan ko muḳhtasar rakkha gaya
ham kahan siine ki tah men ye samundar thamte
ek us ḳhatir tujhe ai chashm-e-tar rakkha gaya
hasil-e-jan par ḳhas-o-ḳhashak-e-hasrat khinch kar
darmiyan us dil ke ḳhvahish ka sharar rakkha gaya
bosa-e-ḳhurshid se khola sahar ka pairahan
zanu-e-shab par mah-e-kamil ka sar rakkha gaya
din ke raston par bicha.i na-rasa.i ki thakan
niind ki dahliz par ḳhvabon ka par rakkha gaya
muztarib rahti hai koh-o-dasht men jaise hava
is tarah siine men sanson ka guzar rakkha gaya
ate-jate har-nafas men maut ka tha za.iqa
ra.egan jiine men marne ka hunar rakkha gaya
ḳhvahishen jagen jamal-e-yar ke didar se
paniyon par mah-e-uryan ka asar rakkha gaya
umr bhar ‘sarmad’ thi jis ko yaad rakhne ki saza
samna us shoḳh se ik lamha bhar rakkha gaya
Leave a Reply