kaash ik shab ke liye ḳhud ko mayassar ho jaa.en
farsh-e-shabnam se uThen aur gul-e-tar ho jaa.en
dekhne vaali agar aankh ko pahchan saken
rang ḳhud parda-e-tasvir se bahar ho jaa.en
tishnagi jism ke sahra men ravan rahti hai
ḳhud men ye mauj samo len to samundar ho jaa.en
vo bhi din aa.en ye bekar guzarte shab-o-roz
teri ankhen tire baazu tira paikar ho jaa.en
apni palkon se jinhen noch ke phenka hai abhi
kya karoge jo yahi ḳhvab muqaddar ho jaa.en
jo bhi narmi hai ḳhayalon men na hone se hai
ḳhvab ankhon se nikal jaa.en to patthar ho jaa.en
Leave a Reply