Parveen Kumar Ashk
samundar men khaḌe ho ro rahe ho
ye kaisi maili chadar dho rahe ho
ye duniya mas.ala allah ka hai
ye miTTi sar pe tum kyuun Dho rahe ho
hamare ansuon ke jugnuon se
sitaro kyuun pareshan ho rahe ho
samundar ko dikha kar aag ab kyuun
dua ki barishon ko ro rahe ho
jahan purkhon ke sajdon ke nishan hain
vo galiyan ḳhuun se kyuun dho rahe ho
suna hoga hamara hadsa bhi
hamare shahr men tum to rahe ho
nahin gar jan-e-jan to dushman-e-jan
hamari jaan ke kuchh to rahe ho
tumhen to ḳhuub hansna chahiye ‘ashk’
hamare haal par tum ro rahe ho
Leave a Reply