Din Ki Bedard Thakan Chehre Pe Le Kar Mat Ja

Qaisarul Jafri

din ki bedard thakan chehre pe le kar mat ja

bam-o-dar jaag rahe honge abhi ghar mat ja

mere purkhon ki virasat ka bharam rahne de

tu haveli ko khula dekh ke andar mat ja

buund bhar dard sambhalta nahin kam-zarfon se

rakh ke tu apni hatheli pe samundar mat ja

phuTne de miri palkon se zara aur lahu

ai miri niind abhi chhoḌ ke bistar mat ja

kuchh to rahne de abhi tark-e-vafa ki ḳhatir

tujh ko jaana hai to ja haath jhaTak kar mat ja

aur kuchh der ye mashq-e-nigah-e-naz sahi

samne baiTh abhi phenk ke ḳhanjar mat ja

dhuup kya hai tujhe andaza nahin hai ‘qaisar’

aable paanv men paḌ ja.enge bahar mat ja