Yashab Tamanna
vo jo ek chehra damak raha hai jamal se
use mil rahi hai ḳhushi kisi ke ḳhayal se
main ne sirf ek hi da.ere men safar kiya
kabhi be-niyaz bhi kar mujhe mah-o-sal se
kabhi hans ke ḳhud hi gale se us ko laga liya
kabhi ro diye hain lipaT ke ḳhud hi malal se
tujhe kya ḳhabar ki vo kaun hai sar-e-rahguzar
kabhi sarsari na guzar kisi ke saval se
vo jo muskura ke guzar raha hai qarib se
use ashna.i zarur hai mere haal se
mujhe aasra bhi nahin kisi ki duaon ka
mujhe ḳhauf aata hai yuun bhi vaqt-e-zaval se
‘yashab’ apne aap se mil ke kitna bhala laga
mujhe fursaten hi nahin milin ka.i saal se
Leave a Reply