Rashid Aazar
ḳhayal ki tarah chup ho sada hue hote
kam-az-kam apni hi avaz-e-pa hue hote
taras raha huun tumhari zaban se sunne ko
ki tum kabhi mira harf-e-vafa hue hote
ajiib kaifiyat-e-be-dili hai donon taraf
ki mil ke soch rahe hain juda hue hote
bahut aziiz sahi ham ko apni ḳhud-dari
maza to jab tha ki teri ana hue hote
ye aarzu rahi apni jo umr bhar ke liye
tiri zaban pe rahe vo maza hue hote
sumum ki tarah jiine se fa.eda kiya hai
kisi ke vaste bad-e-saba hue hote
hamesha ma.il-e-husn-e-butan rahe ‘azar’
kabhi to qa.il-e-husn-e-ḳhuda hue hote
Leave a Reply