Saurabh Shekhar
ik charagh-e-dil faqat raushan agar mera bhi hai
rahnuma mera bhi hai phir rahbar mera bhi hai
ab talak hairan huun main raat ke us ḳhvab se
ḳhuun ki barsat hai ghar tar-ba-tar mera bhi hai
shart har manzur kar li zindagi ki main ne bhi
dastaḳhat ab is qarar-e-zist par mera bhi hai
yuun baharon ke liye mahv-e-dua rahta huun main
phuul ki manind ik laḳht-e-jigar mera bhi hai
husn hai tu tera bhi charcha rahega da.imi
ishq huun main aur afsana amar mera bhi hai
peḌ miTTi dhuup paani men adavat ho ga.i
phuul lagte hi sabhi bole samar mera bhi hai
mah-o-anjum rakh na rakh us men mire malik magar
asman ik chahiye mujh ko ki sar mera bhi hai
alamon ki baat ka ‘saurabh’ bharosa hai mujhe
tajraba kuchh zindagi ka haan magar mera bhi hai
Leave a Reply