Shauq Qidvai
tha band vo dar phir bhi main sau baar gaya tha
manind hava phand ke divar gaya tha
phirta huun main be-dil mira dil kyuun nahin dete
kya tum se jua khel ke main haar gaya tha
saude ko na puchh aaya tha tu naaz se jis din
gesu tira us din mire sar maar gaya tha
dil se na sahi aa.e to mayyat pe vo aḳhir
aate na to marna mira bekar gaya tha
ḳhud main ne jataya hai use hashr ka maidan
mash.had hi se main us ka taraf-dar gaya tha
barchha tha ki tiir apni nazar se ye zara puchh
siine men kuchh is paar se us paar gaya tha
majbur hua vo jo paḌa zulf ka phanda
‘shauq’ us ke vahan ho ke giraftar gaya tha
Leave a Reply