dekhiye ahl-e-mohabbat hamen kya dete hain
kucha-e-yar men ham kab se sada dete hain
roz ḳhushbu tiri laate hain saba ke jhonke
ahl-e-gulshan miri vahshat ko hava dete hain
manzil-e-sham.a tak asan rasa.i ho jaa.e
is liye ḳhaak patangon ki uḌa dete hain
su-e-sahra bhi zara ahl-e-ḳhirad ho aao
kuchh baharon ka pata abla-pa dete hain
mujh ko ahbab ke altaf-o-karam ne maara
log ab zahr ke badle bhi dava dete hain
saath chalta hai koi aur bhi su-e-manzil
mujh ko dhoka mire naqsh-e-kaf-e-pa dete hain
zindagi marg-e-musalsal hai magar ai ‘tabish’
haa.e vo log jo jiine ki dua dete hain
Leave a Reply