Makhmoor Saeedi
jab koi sham-e-hasin nazr-e-ḳharabat hui
aksar aise men tire gham se mulaqat hui
ap-apne ko na pahchan sake ham ta-der
un se bichhḌe to ajab surat-e-halat hui
husn se nibh na na saki vaz-e-karam aḳhir tak
avval avval to mohabbat ki mudarat hui
roz mai pi hai tumhen yaad kiya hai lekin
aaj tum yaad na aa.e ye na.i baat hui
us ne avaz men avaz mila di thi kabhi
aaj tak ḳhatm na mausiqi-e-jazbat hui
dil pe ik gham ki ghaTa chha.i hui thi kab se
aaj un se jo mile TuuT ke barsat hui
kis ki parchha.in paḌi kaun idhar se guzra
itni rangin jo guzargah-e-ḳhayalat hui
un se ummid-e-mulaqat ke ba.ad ai ‘maḳhmur’
muddaton tak na ḳhud apne se mulaqat hui
Leave a Reply