aks hai a.ina-e-dahr men surat meri
kuchh haqiqat nahin itni hai haqiqat meri
dekhta main use kyunkar ki naqab uThte hi
ban ke divar khaḌi ho ga.i hairat meri
roz vo ḳhvab men aate hain gale milne ko
main jo sota huun to jaag uThti hai qismat meri
sach hai ehsan ka bhi bojh bahut hota hai
chaar phulon se dabi jaati hai turbat meri
a.ine se unhen kuchh uns nahin baat ye hai
chahte hain koi dekha kare surat meri
main ye samjhun koi ma.ashuq mire haath aaya
mere qaabu men jo aa jaa.e tabi.at meri
bu-e-gesu ne shagufa ye naya chhoḌa hai
nik.hat-e-gul se ulajhti hai tabi.at meri
un se iz.har-e-mohabbat jo koi karta hai
duur se us ko dikha dete hain turbat meri
jaate jaate vo yahi kar ga.e takid ‘jalil’
dil men rakhiyega hifazat se mohabbat meri
Leave a Reply