Wajud-E-KHak Se Bahar Nikal Dega Wo

vajūd-e-ḳhāk se bāhar nikāl degā vo

mujhe bhī apne sarāpe meñ Dhaal degā vo

maiñ jāntā huuñ mohabbat meñ hārne ke ba.ad

sabhī ke sāmne merī misāl degā vo

shikoh-e-baḳht pe masrūr shaḳhs ko āḳhir

kisī faqīr ke qadmoñ meñ Daal degā vo

maiñ us ke haq meñ yahāñ āḳhirī duā-go huuñ

mujhe bhī apnī safoñ se nikāl degā vo

koī to shakl hai maujūd mujh meñ bhī ‘shahzād’

maiñ sañg huuñ to mujhe ḳhadd-o-ḳhāl degā vo

Leave a Comment