Ameer Minai
hatao aaina ummid-var ham bhi hain
tumhare dekhne valon men yaar ham bhi hain
tadap ke ruuh ye kahti hai hijr-e-janan men
ki tere saath dil-e-be-qarar ham bhi hain
rahe dimagh agar asman pe duur nahin
ki tere kuche men mast-e-ghubar ham bhi hain
kaho ki nakhl-e-chaman ham se sar-kashi na karen
unhin ki tarah se bagh-o-bahar ham bhi hain
hamare aage zara ho samajh ke zamzama-sanj
ki ek naghma-sara ai hazar ham bhi hain
kahan tak aaine men dekh-bhal idhar dekho
ki ik nigah ke ummid-var ham bhi hain
sharab munh se lagate nahin hain ai zahid
firaq-e-yar men parhez-gar ham bhi hain
hamara naam bhi likh lo jo hai qalam jaari
qadim aap ke khidmat-guzar ham bhi hain
huma hain gird miri haddiyon ke aath pahr
sag aa ke kahte hain ummid-var ham bhi hain
jo ladkhada ke gire tu qadam pe saaqi ke
‘amir’ mast nahin hoshyar ham bhi hain
Leave a Reply