Tahira Jabeen Tara
ye aankh nam thi zaban par magar saval na tha
ham apni zaat men gum the koi khayal na tha
saja liya hai hatheli pe ham ne us ka naam
is liye to bichhad jaane ka malal na tha
agarche mo’tabar thahre the ham zamane men
hamare paas to aisa koi kamal na tha
usi ke saath the ham us se be-khabar rah kar
agarche rabta us se koi bahal na tha
tire hi naam pe ye zindagi kati saari
agarche tera kabhi bhi hamen visal na tha
Leave a Reply