ab to ye soch ke bhī dil mirā ghabrātā hai
sub.h kā bhūlā huā shaam ko ghar aatā hai
ek ik karke bujhe jaate haiñ raḳhshanda nujūm
ek tū hai jo ba-har-samt nazar aatā hai
ab tirā ḳhvāb bhī ik paikar-e-sīmīñ kī tarah
āsmānoñ se mire dil meñ utar aatā hai
lazzat-e-sañg kī ḳhātir hī bayābāñ se koī
chhoḌ kar baaġh sar-e-rāh guzar aatā hai
dil kī dahlīz se jaatā hai jo ik marmarīñ jism
har taraf ghuum ke bā-dīda-e-tar aatā hai
jism thak kar bhī nahīñ raah meñ ruktā pal bhar
dil magar us ke shabistāñ meñ Thahar aatā hai