Poet
ab to ye soch ke bhi dil mira ghabrata hai
sub.h ka bhula hua shaam ko ghar aata hai
ek ik karke bujhe jaate hain raḳhshanda nujum
ek tu hai jo ba-har-samt nazar aata hai
ab tira ḳhvab bhi ik paikar-e-simin ki tarah
asmanon se mire dil men utar aata hai
lazzat-e-sang ki ḳhatir hi bayaban se koi
chhoḌ kar baagh sar-e-rah guzar aata hai
dil ki dahliz se jaata hai jo ik marmarin jism
har taraf ghuum ke ba-dida-e-tar aata hai
jism thak kar bhi nahin raah men rukta pal bhar
dil magar us ke shabistan men Thahar aata hai
Leave a Reply