bhitar basne vaala ḳhud bahar ki sair kare maula ḳhair kare
ik murat ko chahe phir ka.abe ko dair kare maula ḳhair kare
ishq-vishiq ye chahat-vahat man ka bhulava phir man bhi apna kya
yaar ye kaisa rishta jo apnon ko ghair kare maula ḳhair kare
ret ka tuuda andhi ki faujon par tiir chala.e Tahni peḌ chaba.e
chhoTi machhli dariya men ghaḌiyal se bair kare maula ḳhair kare
soch ki kafir har murat pe jaan chhiḌakta hai bin paanv thirakta hai
man ka musalman ab qible ki janib pair kare maula ḳhair kare
fikr ki chaak pe maaTi ki tu shakl badalta hai ya ḳhud hi Dhalta hai
‘bekal’ be-par lafzon ki taḳh.il ko tair kare maula ḳhair kare
Leave a Reply