dastaras men nahin halat tujhe kya ma.alum
ab zaruri hai mulaqat tujhe kya ma.alum
raat ke pichhle pahar nind-shikan tanha.i
kaise karti hai savalat tujhe kya ma.alum
tu ba-zid hai ki sar-e-am parastish ho tiri
main huun paband-e-rivayat tujhe kya ma.alum
jashn savan ka yuun baḌh-chaḌh ke manane vaale
zulm kya Dhati hai barsat tujhe kya ma.alum
shana-e-vaqt pe ab zulf-e-pareshan ki tarah
bikhri rahti hai miri zaat tujhe kya ma.alum
silsila-var dahakte hain sahar hone tak
sar-e-mizhgan mare jazbat tujhe kya ma.alum
saada baten thiin ‘ḳhayal’ us ki magar un men ka.i
chup the rangin ḳhayalat tujhe kya ma.alum
Leave a Reply