yaar ko bebaki men apna sa ham ne kar liya
ya.ani us ne Thokaron men sar hamara dhar liya
ishq-e-rusva ne di afzuni hijab-e-husn ko
jo uTha parda yahan se us ne vaan munh par liya
is ko mai-ḳhvari nahin kahte hain ḳhun-ḳhvari hai ye
mere dil se li gazak aur ghair se saghar liya
naam ko dil men jagah chhoḌi na dagh-e-ishq ne
ek mehman aisa aaya jis ne saara ghar liya
zauq dekho mujh se said-e-na-tavan ke vaste
tegh li ik haath men ik haath men ḳhanjar liya
main sitara-soḳhta vo huun ki jis ka za.icha
us ghaḌi khincha gaya jab daagh ka aḳhtar liya
chashm-o-dil rakkho ho yaaro jaav Tuk dekho use
mujh se kya kahte ho us ne dil tira kyun-kar liya
ai ‘raza’ raah men ḳhizr ki mat raah dekh
ghar ke jaane men kisi ne bhi bhala rahbar liya
Leave a Reply