Ye zaKHm Hain Ki Phul Hain Ye Zahr Hain Ki Jam Hain

Poet

ye zaḳhm hain ki phuul hain ye zahr hain ki jaam hain

magar ye mere sher ab faqat tumhare naam hain

na tum se ho ki mil sako na mujh se ho ki vaqt duun

tumhen bhi kitne kaam hain mujhe bhi kitne kaam hain

vo maslahat-shanas tha so us ka dosh kuchh nahin

ye shahr bhar ki tohmaten miri vafa ke naam hain

main us ko yaad jab karun ghazal ke diip jal uThen

nisar is ḳhayal par ki lafz bhi ghulam hain

vo barishen agarche ab kisi ki ho chukin magar

ye mere dil ke raste hanuz tishna-kam hain

ai kam-nazar na sarsari nazar se dekh tu ki ham

sahar ka ujla nuur hain shafaq men lipTi shaam hain

ab un se kya baghavaten ab un se kya adavaten

ki vo faqih-e-shahr hain vo vaqt ke imaam hain