gaya ab aftab-e-hashr ka bhi jalva-gar hona
shab-e-furqat hamari hai ye kya jaane sahar hona
vahan ja kar mire nalon ka yarab be-asar hona
qayamat tha kisi ka raat ko dushman ke ghar hona
bahut achchhe hain jin par zulm hote hain zamane ke
isi ko ahl-e-dil kahte hain manzur-e-nazar hona
ḳhayal ik naznin ka dil men phir rah rah ke aata hai
zara siine men ab tham tham ke o dard-e-jigar hona
hazaron neshtar paivast hon jis ki rag-e-jan men
use dushvar hai marhun-e-sa.i-e-charagar hona
ye kya kam hai mili qaid-e-qafas se mujh ko azadi
mere kaam aa gaya aḳhir mira be-bal-o-par hona
bahut hi ibrat-angez aur hasrat-ḳhez manzar hai
lahad par ek be-kas ke kisi ka nauhagar hona
irade ḳhushk zahid hauz-e-mai ho ja.enge ḳhali
koi asan hai ai ‘safdar’ tere daman ka tar hona
Leave a Reply