sub.h-e-nau ham to tire saath numayan honge
aur honge jo halak-e-shab-e-hijran honge
sadma-e-zist ke shikve na kar ai jan-e-‘ra.is’
ba-ḳhuda ye na tire dard ka darman honge
meri vahshat men abhi aur taraqqi hogi
tere gesu to abhi aur pareshan honge
azma.ega bahar-hal hamen jabr-e-hayat
ham abhi aur asir-e-gham-e-dauran honge
ashiqi aur marahil se abhi guzregi
imtihan aur mohabbat ke miri jaan honge
qalb-e-pakiza-nihad o dil-e-safi de kar
a.ina ham ko banaya hai to hairan honge
sadqa-e-tirgi-e-shab se gila-sanj na ho
ki na.e chand isi shab se firozan honge
aaj hai jabr-o-tashaddud ki hukumat ham par
kal hamin beḳh-kun-e-qaisar-o-ḳhaqan honge
vo ki auham o ḳhurafat ke hain said-e-zabun
aḳhir is dam-e-ghulami se gurezan honge
sirf tariḳh ki raftar badal ja.egi
na.i tariḳh ke varis yahi insan honge
Leave a Reply