Poet
hasin saman na hasin ka.enat hai shayad
kisi ka husn hi jan-e-hayat hai shayad
gham-e-hayat se hai zindagi men gira.i
gham-e-hayat hi jan-e-hayat hai shayad
bahut qarib se dekhi thi zindagi ki bahar
mire ḳhayal se ye gul ki baat hai shayad
vo ek lamha masarrat se jo guzar jaa.e
usi ka naam mata-e-hayat hai shayad
qadam qadam pe haqiqat qadam qadam pe majaz
usi tilism men kul ka.enat hai shayad
hazar but-shikan aa.e magar na toḌ sake
ghurur sab se baḌa somnat hai shayad
hai jan-gudaz bahut andalib ka naghma
kuchh is men dil ki mire vardat hai shayad
udaas udaas hain sham-o-sahar ke nazzare
bujha bujha sa sharar-e-hayat hai shayad
kise ḳhabar jo bani apni jaan par ‘talib’
shikast-e-ishq shikast-e-hayat hai shayad
Leave a Reply