Saim Ji
dayar-e-dil se kisi ka guzar zaruri tha
ujaaḌ raste pe koi shajar zaruri tha
zara si der men bujhne ko tha magar us dam
diye ko chalti hava ka samar zaruri tha
agar na hote ye duniya isi tarah chalti
hamara hona jahan men magar zaruri tha
nazar men sher sajate ghazal sama.at men
suḳhan ke shahr men aisa nagar zaruri tha
hamare dil men rahi hai bas ek hi ḳhvahish
dayar-e-yar men apna bhi ghar zaruri tha
chhalak rahi hain mire rome rome se ḳhushiyan
tumhari bazm ka kuchh to asar zaruri tha
Leave a Reply