tumhen paane ki ḳhatir main samundar paar aa.i thi
ki jo kuchh paas tha mere vo sab kuchh vaar aa.i thi
zamana bhi ghazab ki chaal mere saath chalta tha
ajab jivan ki baazi thi main ḳhud ko haar aa.i thi
vahan par kam se kam teri ziyarat ho hi jaati thi
main tera shahr yunhi chhoḌ kar be-kar aa.i thi
paḌe hain aable paanv men raste hain kaThin kitne
to kya is dasht-e-furqat men main chunne ḳhaar aa.i thi
nahin koi zarurat ab miri nindon se kah dena
kisi ke ḳhvab ki ḳhatir main ankhen vaar aa.i thi
chura kar le gaya mujh ko yunhi vo be-dhiyani men
mujhe milne vo aaya tha main jab is baar aa.i thi
mujhe kab hosh tha dekhun uTha.in ungliyan kis ne
main teri justuju men jab sar-e-bazar aa.i thi
mohabbat se kisi ne thaam kar gul-dan men rakha
‘kanval’ ko saath le kar paniyon ki dhaar aa.i thi
Leave a Reply