dil men baiTha tha ek Dar shayad
aaj bhi hai vo ham-safar shayad
haath patthar se ho ga.e ḳhali
peḌ par hai nahin samar shayad
DhunDhta tha vajud apna vo
tha idhar ab gaya udhar shayad
surḳhiyan ug rahi hain daman par
ho gaya haath ḳhuun se tar shayad
phuul ulfat ke khil rahe hon jahan
hoga aisa bhi ik nagar shayad
bekali baḌh ga.i hai dariya ki
kah gaya jhuk ke kuchh shajar shayad
dard ka ho gaya hai maskan vo
log kahte hain jis ko ghar shayad
mil ke un se ḳhushi hui mujh ko
vo bhi honge to ḳhush magar shayad
rote rote hansi miri ḳhvahish
mil ga.i ik na.i ḳhabar shayad
din ka kaTna muhal hai to sahi
raat ho ja.egi basar shayad
aag paani men jo lagata hai
vo bhi hoga koi bashar shayad
sehn-e-dil se ḳhushi nahin guzri
rasta tha vo pur-ḳhatar shayad
dhuup ke ghar ghaTa ga.i ‘ja.afar’
ḳhushk karne ko bal-o-par shayad
Leave a Reply