kyuun mujh se gurezan hai main tera muqaddar huun
ai umr-e-ravan ḳhush huun main tujh ko mayassar huun
main aap bahar apni main apna hi manzar huun
ḳhud apne hi ḳhvabon ki ḳhushbu se mo.attar huun
be-rang na vapas kar ik sang hi de sar ko
kab se tira talib huun kab se tire dar par huun
jab jaisi zarurat ho ban jaata huun vaisa hi
ḳhud apni tabi.at men shisha huun na patthar huun
lamhon ke tasalsul men marzi hai miri shamil
main vaqt ki shah-e-rag par rakkha hua ḳhanjar huun
asuda huun main apne virana-e-hasti men
duniya tujhe milne ke imkan se bahar huun
jab chahun simaT kar main zarre men sama ja.un
vus.at men to vaise hi sahra huun samundar huun
Leave a Reply