Poet
ijad gham hua dil-e-muztar ke vaste
paida junun hua hai mire sar ke vaste
karte ho fikr ghafilo kya ghar ke vaste
duniya men sab muqim hain dam bhar ke vaste
har shai men jo ki dekhte hain jalva dost ka
vo log sajda karte hain patthar ke vaste
us but ne ek baat na maani shab-e-visal
lakhon diye ḳhuda o payambar ke vaste
sun kar payam-e-vasl main qasid se ji uTha
hai mo.ajaza zarur payambar ke vaste
mizhgan ko teri ham ne jagah apne dil men di
zeba ye myaan hai isi ḳhanjar ke vaste
likhta huun us pari ki sifat chashm-e-shoḳh ki
tar-e-nigah-e-hur ho mistar ke vaste
balish ki ja hai mujh ko tira sang-e-astan
kaafi hai ḳhak-e-dar mare bistar ke vaste
jaata huun chiin kakul-e-ambar-fishan ko main
sauda ḳharidta hai mujhe sar ke vaste
jitne the zulm sab vo jafa-kar kar chuka
baaqi rahe na charḳh-e-sitamgar ke vaste
karta huun roz-e-hijr main tadbiren dosto
kya kya tasalli-e-dil-e-muztar ke vaste
saaqi sharab-e-ashk hai yaan jam-e-chashm men
ehsan uTha.en kyuun mai o saghar ke vaste
ai ‘sehr’ qadr-dan jo na ho koi sher ka
to zindagi hai maut suḳhnavar ke vaste
Leave a Reply