Usne Nigah-E-Lutf-E-Karam Bar Bar Ki

us ne nigāh-e-lutf-e-karam baar baar kī

ab ḳhairiyat nahīñ hai dil-e-be-qarār kī

Dar ye hai khul na jaa.e kahīñ rāz-e-ishq bhī

nibhne lagī hai un se mire rāzdār kī

sab ke nasīb meñ hai kahāñ mauj-e-dard-o-ġham

maḳhsūs haiñ ināyateñ parvardigār kī

yādoñ kī anjuman meñ unheñ bhī bulā liyā

ik shaam yuuñ bhī ham ne bahut yādgār kī

jab ham hī fasl-e-gul meñ chaman se nikal ga.e

phir kyuuñ sunā rahe ho kahānī bahār kī

‘zākir’ ham apnā dil bhī vahīñ chhoḌ aa.e haiñ

kis darja pur-kashish thī fazā us dayār kī

Leave a Comment