Zakir Khan Zakir
us ne nigah-e-lutf-e-karam baar baar ki
ab ḳhairiyat nahin hai dil-e-be-qarar ki
Dar ye hai khul na jaa.e kahin raz-e-ishq bhi
nibhne lagi hai un se mire razdar ki
sab ke nasib men hai kahan mauj-e-dard-o-gham
maḳhsus hain inayaten parvardigar ki
yadon ki anjuman men unhen bhi bula liya
ik shaam yuun bhi ham ne bahut yadgar ki
jab ham hi fasl-e-gul men chaman se nikal ga.e
phir kyuun suna rahe ho kahani bahar ki
‘zakir’ ham apna dil bhi vahin chhoḌ aa.e hain
kis darja pur-kashish thi faza us dayar ki
Leave a Reply