Sabihuddin Shaibi
jise ḳhud se juda rakkha nahin hai
vo mera hai magar mera nahin hai
jise khone ka mujh ko Dar hai itna
use main ne abhi paaya nahin hai
nuqush ab zehn se miTne lage hain
bahut din se use dekha nahin hai
suna hai phuul ab khilte nahin hain
to kya khul kar vo ab hansta nahin hai
nagar chhoḌa hai jab se us ghazal ne
koi sha.ir ghazal kahta nahin hai
tiri yadon se raushan hai mira dil
ye vo suraj hai jo Dhalta nahin hai
miri ankhon ka ye dariya ajab hai
ki bahta hai to phir thamta nahin hai
ḳhushi ka ho koi ya gham ka lamha
guzar jaata hai kyon rukta nahin hai
‘sabih’-o-ḳhub-ru chehre ka.i hain
magar koi bhi us jaisa nahin hai
Leave a Reply