Mushaf Iqbal Tausifi
hava rah men diye taqon men maddham ho ga.e hain
mahaz ab duriyon ke kitne mohkam ho ga.e hain
hujum-e-na-shanasan men hai itna hi ghanimat
ye rishte ajnabiyyat ke jo qaa.em ho ga.e hain
chaTTanon se jahan thi guftugu-e-saḳht lazim
vahin shirin-suḳhan lahje mula.em ho ga.e hain
mire bachche tira bachpan to main ne bech Daala
buzurgi oḌh kar kandhe tire ḳham ho ga.e hain
azabon se Tapakti ye chhaten barson chalengi
abhi se kyuun makin masruf-e-matam ho ga.e hain
Leave a Reply