vo nau-khez nuura vo ik bint-e-maryam
vo makhmur ankhen vo gesu-e-pur-kham
vo arz-e-kalisa ki ik mah-para
vo dair-o-haram ke liye ik sharara
vo firdaus-e-maryam ka ik ghuncha-e-tar
vo taslis ki dukhtar-e-nek-akhtar
vo ik nurse thi chara-gar jis ko kahiye
madava-e-dard-e-jigar jis ko kahiye
javani se tifli gale mil rahi thi
hava chal rahi thi kali khil rahi thi
vo pur-roab tevar vo shadab chehra
mata-e-javani pe fitrat ka pahra
miri hukmarani hai ahl-e-zamin par
ye tahrir tha saaf us ki jabin par
safed aur shaffaf kapde pahan kar
mire paas aati thi ik huur ban kar
vo ik asmani farishta thi goya
ki andaz tha us men jibrail ka sa
vo ik marmarin huur khuld-e-barin ki
vo taabir aazar ke khvab-e-hasin ki
vo taskin-e-dil thi sukun-e-nazar thi
nigar-e-shafaq thi jamal-e-nazar thi
vo shoala vo bijli vo jalva vo partav
sulaiman ki vo ik kaniz-e-subuk-rau
kabhi us ki shokhi men sanjidgi thi
kabhi us ki sanjidgi men bhi shokhi
ghadi chup ghadi karne lagti thi baten
sirhane mire kaat deti thi raten
ajab chiiz thi vo ajab raaz thi vo
kabhi soz thi vo kabhi saaz thi vo
naqahat ke aalam men jab aankh uthti
nazar mujh ko aati mohabbat ki devi
vo us vaqt ik paikar-e-nur hoti
takhayyul ki parvaz se duur hoti
hansati thi mujh ko sulati thi mujh ko
dava apne hathon se mujh ko pilati
ab achchhe ho har roz muzhda sunati
sirhane mire ek din sar jhukae
vo baithi thi takiye pe kuhni tikae
khayalat-e-paiham men khoi hui si
na jaagi hui si na soi hui si
jhapakti hui baar baar us ki palken
jabin par shikan be-qarar us ki palken
vo ankhon ke saghar chhalakte hue se
vo aariz ke shoale bhadakte hue se
labon men tha laal-o-gohar ka khazana
nazar arifana ada rahibana
mahak gesuon se chali aa rahi thi
mire har nafas men basi ja rahi thi
mujhe lete lete shararat ki sujhi
jo sujhi bhi to kis qayamat ki sujhi
zara badh ke kuchh aur gardan jhuka li
lab-e-laal-e-afshan se ik shai chura li
vo shai jis ko ab kya kahun kya samajhiye
behisht-e-javani ka tohfa samajhiye
sharab-e-mohabbat ka ik jam-e-rangin
subu-zar-e-fitrat ka ik jam-e-rangin
main samjha tha shayad bigad jaegi vo
havaon se ladti hai lad jaegi vo
main dekhunga us ke bipharne ka aalam
javani ka ghussa bikharne ka aalam
idhar dil men ik shor-e-mahshar bapa tha
magar us taraf rang hi dusra tha
hansi aur hansi is tarah khilkhila kar
ki sham-e-haya rah gai jhilmila kar
nahin janti hai mira naam tak vo
magar bhej deti hai paigham tak vo
ye paigham aate hi rahte hain akasr
ki kis roz aaoge bimar ho kar
Leave a Reply