azizo is ko na ghadiyal ki sada samjho
ye umr-e-rafta ki apni sada-e-pa samjho
baja kahe jise aalam use baja samjho
zaban-e-khalq ko naqqara-e-khuda samjho
na samjho dasht shifa-khana-e-junun hai ye
jo khaak si bhi pade phankni dava samjho
samajh tu kor-savadon ko ho jo ilm na ho
agar samajh bhi na ho kor-e-be-asa samjho
pade kitab ke qisson men kya karo dil saaf
safa ho dil to ba-az rauzatus-safa samjho
hanse jo vo mire rone pe to saf-e-mizhgan
na samjho tum use divar-e-qahqaha samjho
nafas ki amad-o-shud hai namaz-e-ahl-e-hayat
jo ye qaza ho to ai ghafilo qaza samjho
tumhari raah men milte hain khaak men lakhon
is aarzu men ki tum apna khak-e-pa samjho
duaen dete hain ham dil se tegh-e-qatil ko
lab-e-jarahat-e-dil ko lab-e-dua samjho
baha diya mira khuun us ne apne kuche men
usi ko yaaro diyat samjho khun-baha samjho
samajh hai aur tumhari kahun main tum se kya
tum apne dil men khuda jaane sun ke kya samjho
tumhen hai naam se kya kaam misl-e-aina
jo ru-ba-ru ho use surat-ashna samjho
zahe nasib ki hangam-e-mashq tir-e-sitam
hamare dher ko tum to vo khaak ka samjho
nahin hai kam zar-e-khalis se zardi-e-rukhsar
tum apne ishq ko ai ‘zauq’ kimiya samjho