arsa-e-ḳhvab se uTh halqa-e-ta.abir men aa
gum-shuda ro.ab-e-junun kasa-e-tash.hir men aa
intiha mabda-e-hasti ki fana hai ya baqa
ghaur se dekhte hain baḳht ki tasvir men aa
ai ḳharabat-e-tanaffur ke pareshan makin
gar sukun chahta hai ishq ki ta.amir men aa
hiddat-e-did nigahon ki ibarat se nikal
aur yaḳh-basta mire rauzan-e-tahrir men aa
chaḌh ke phir sar pe mire bole asiri ka ḳhumar
qaid kar le mujhe phir zulf ki zanjir men aa
ahd-e-mazi ke ḳhush-a.ind bhaTakte lamhe
vaqt aa pahuncha hai ab haal ki jagir men aa
jal-bujhe garmi-e-anfas se donon ka vajud
gholne ḳhud ko mire qurb ki tasir men aa
lazzat-e-vasl ko hasil ho zamin ki jannat
mujh se milne ke liye vadi-e-kashmir men aa
zer-e-pa rakh ke sabhi aks-e-fusun-e-taqdir
phir javan hone ko gahvara-e-tadbir men aa
ai ḳhizan-zad agar chahta hai rizq-e-bahar
daman-e-zist liye rauza-e-shabbir men aa
ajizi kahne lagi gar ho bulandi ki talab
dil jhuka da.ira-e-na.ara-e-takbir men aa
diya ugte hue suraj ne ye paigham ‘nadim’
in andheron se nikal ḳhema-e-tanvir men aa
Leave a Reply