muzmahil hone pe bhi ḳhud ko javan rakhte hain ham
ek sar hai jis pe saton asman rakhte hain ham
ham gareban-chak logon ko tahi-daman na jaan
le qimar-e-ashiqi men naqd-e-jan rakhte hain ham
koi to aḳhir chala aa.ega pursish ke liye
tu na aa.ega to marg-e-na-gahan rakhte hain ham
ehtiram-e-gham se hain sukhe jaziron ki tarah
varna in ankhon men bahr-e-be-karan rakhte hain ham
ishq men zauq-e-takallum hai halakat-afrin
aarzu bhi ehtiyatan be-zaban rakhte hain ham
mah-vashon ke arizon men dekhte hain apna aks
allah allah apna saaya bhi kahan rakhte hain ham
laakh hon phaili hui manzil-ba-manzil zulmaten
saath apne mash.al-e-husn-e-butan rakhte hain ham
Leave a Reply