Sufi
is chaman ka ajiib maali hai
jis ne har shaḳh kaaT daali hai
din ujala ganva ke baiTh gaya
raat ne raushni chura li hai
gham ki ismat bachchi hui thi magar
vaqt ne vo bhi raund daali hai
mo.ajiza ho jo bach nikal jaae
panch shahbaz ek laali hai
ye tira adl kya hua yarab
koi adna hai koi aali hai
aankh men chubh gae kai manzar
ab kahan niind aane vaali hai
pahle vaqton men ho to ho shayad
dosti ab hasin gaali hai
ḳhema-e-zabt ki tanaben khinch
kuchh ghaTa si barasne vaali hai
chalte rahna kaThin hua ‘hasrat’
paanv zaḳhmi hain raat kaali hai
Leave a Reply